HAO PE MOLE!

ʻOku lau ʻo pehē tokua ʻi he aʻu ki Pilitānia ʻa e ongoongo kuo ngoto ʻa e fuʻu meili-sitima ko e Titanic, naʻe feʻefiʻefihi ʻa e fuʻu kakai naʻe ʻaukau mai ki he ʻōfisi ʻo e Kautaha Vaka naʻe ʻonautolu ʻa e meili-sitimá. Ko siʻi ngaahi fāmili ʻeni ʻo e kakai tuʻumālie naʻe folau ʻi hono hopoki ʻo e fuʻu vaka ni. Naʻe taʻofi ha toe feʻaluʻaki ʻa e ngaahi meʻalelé koeʻuhí ko ʻene feʻefiʻefihi ʻa e konga hala ko iá.

ʻI he hūʻanga ki he ʻōfisí, naʻe fokotuʻu ai ʻi he ongo tafaʻakí ha ongo fuʻu papa fakahinohino. ʻI he fuʻu papa ʻo e tafaʻaki ki he hihifó naʻe tohi mata lalahi ai ʻo pehē: Ko kinautolu kuo mahino kuo haó. ʻI he fuʻu papa naʻe tuʻu ʻi he tafaʻaki ki hahaké, naʻe tohi ai ʻo pehē: Ko kinautolu kuo mahino kuo molé.

Lolotonga ʻa e tuʻu fakalongolongo ʻa e fuʻu kakaí, naʻe hū mai ha tangata mei he ʻōfisí mo ha fuʻu lauʻipepa (cardboard) kuo ʻosi tohi ai ʻa e hingoa ʻo ha taha ʻo e kau pasese ʻo e Titanic. Naʻe fakalongo mate ʻa e fuʻu kakaí ʻo tatali ke vakai pe ko e tafaʻaki fē ʻe afe ki ai ʻa e tangatá. Ko e fē ʻa e tafaʻaki te ne fokotuʻu ki ai ʻa e hingoá; ki he tafaʻaki ʻo kinautolu kuo haó, pe ki he tafaʻaki ʻo kinautolu kuo molé?

Naʻe ʻilo pau ʻe he fuʻu kakai kotoa naʻe tuʻu ʻo mamatá, ko kinautolu kotoa naʻe folau ʻi he Titanic, naʻe ua matematē pē ʻa e kalasi naʻe kau ki ai ʻa e kau folaú. Te nau kau ki he faʻahinga ʻi hahaké, pe ko e faʻahinga ʻi hihifó; ko e faʻahinga kuo hao, pe ko e faʻahinga kuo mole.

"Ka ʻo ka ʻiloange ʻe hoko mai ʻa e Fanautama ʻa Tangatá, kuo ne ʻai hono nāunaú, pea haʻofia ia ʻe he kau ʻāngeló kotoa pē, te ne toki nofo ʻi hono taloni lāngilangiʻiá: pea ʻe fakatahataha ki hono ʻaó ʻa e ngaahi kakai kotoa pē; pea te ne vaheʻi kinautolu, ʻo hangē ʻoku vaheʻi ʻe ha tauhisipi ʻa e fanga sipí mei he fanga kosí: pea te ne fokotuʻu ʻa e fanga sipí mei hono toʻomataʻú, ka ko e fanga kosí mei hono toʻohemá."

Sīsū - Mātiu 25: 31-33