KO E KIʻI TAMAPUA TUPENU NE FUʻU MAHUʻINGA

Naʻe talanoa ʻe ha faifekau ʻo kau ki hano ʻofefine ko Losimeli ʻa ia naʻe taʻu uofulu-mā-tolu, mo haʻane kiʻi tamapua tupenu molū naʻe foaki ange maʻana ʻi he taimi naʻe kei taʻu tolu aí. Naʻe ngāue ʻa e faifekaú ʻi Lonitoni, ʻIngilani, pea ʻi he kei taʻu tolu ʻa Losimelí, naʻe pau ke hiki ʻa e fāmili ni ki ʻAositelēlia. Ko ia naʻa nau puna vakapuna mei Lonitoni ki Melipoane. Ko e toki folau lōloa moʻoni ʻeni ki ha kiʻi taʻahine naʻe kei taʻu tolu. ʻI he aʻu ʻa e folaú ki Melipoané, naʻe tafe noa pē ʻa e loʻimata ʻo Losimelí ʻi hono ongo kouʻahé ʻi he hulu ʻene ongosia ʻi ha folau lōloa pehē.

ʻI he malaʻe vakapuna ʻi Melipoané, naʻe talitali ai ʻa e fāmili ni ʻe honau ngaahi kaumeʻa. Ko e toko taha ʻi he kau tali folaú naʻane ʻomi ha kiʻi meʻaʻofa tali folau maʻa Losimeli ko e kiʻi tamapua tupenu molū. ʻI he fuʻu ongosia ʻa Losimelí naʻe ʻikai ai ke fai haʻane fakamālō, ka naʻane toʻo pē ʻa e kiʻi tamapuá ʻo kuku ki hono kiʻi matá ʻo fufuuʻi ʻaki hono loʻimatá, pea hanga ai foki ʻe he kiʻi tamapuá ʻo holoholoʻi hono loʻimatá mei hono matá mo hono ongo kouʻahé.

ʻI he pō ko iá, naʻe ʻikai pē ke mavahe meia Losimeli ʻa e kiʻi tamapuá, ka ne ʻalu pē mo ia ki hono mohengá ʻo fai ai pē ʻe he kiʻi tamapuá ʻa e holoholoʻi hono loʻimatá. ʻI he pō ko hono uá, naʻe ʻikai ke kei tafe ha loʻimata ʻo Losimeli, ka naʻe ʻikai pē ke toe mavahe meiate ia ʻa e kiʻi tamapua moluū. Naʻe hokohoko pehē atu ʻo laulau uike mo laulau mahina, mo laulau taʻu foki. Ne hoko ʻa e kiʻi tamapua molū ni ko e koloa mahuʻinga taha ia ʻa Losimelí. ʻI he ngaahi taʻu kimuí, naʻe ʻi ai ha ngaahi meʻaʻofa ia kia Losimeli naʻe fuʻu hulu atu honau ngaahi mahuʻinga fakapaʻangá, ka neongo ia, naʻe ʻikai pē ke toe ʻi ai ha meʻa ia ʻe ʻofa ange ai ʻa Losimeli ʻo lahi ange ʻi he ʻene ʻofa ʻi he kiʻi tamapua tupenu moluū.

ʻOku moʻoni naʻe ʻalu pē ʻa e taimí mo e fakaʻau ke motuʻa ange ʻa e kiʻi tamapuá mo ʻuli. Naʻe faingataʻa foki hano feinga ke fō pe fakamaʻa. Ko e kakai naʻe ʻikai te nau ʻilo ʻa e ʻuhinga kia Losimeli mo ʻene ongo matuʻá ʻa e kiʻi tamapuá; ʻi he ʻenau mamata ki he kiʻi tamapuá ʻi honau loto falé, naʻa nau ʻohovale ʻi he kei tauhi ʻe he fāmilí ha kiʻi tamapua ʻuli mo motuʻa pehē. Ki he kakai kehé, naʻe totonu ke ʻave ʻa e kiʻi tamapuá ki he vevé. Kae ʻilonga ha taha naʻa ne ʻilo mo ʻofa moʻoni ʻia Losimeli, naʻe mahino ki ai ʻa e mahuʻinga ʻo e kiʻi tamapuá kia Losimelí. Kapau ʻoku ke ʻofa ʻia Losimeli, kuo pau pē ke ke ʻofa ʻi he kiʻi tamapuá. ʻOku ʻikai ala fakamāvaeʻi ʻa e ʻofa ʻia Losimelí mo e ʻofa ʻi he ʻene tamapuá.

ʻOku pehe ni ʻa e ʻulungaanga ʻo e ʻofa moʻoní, ʻa e ʻofa faka-ʻOtuá, ʻa e ʻofa ʻoku ʻikai sio ki ha mahuʻinga fakamatelie pe fakapaʻangá. Ko e ʻofa ʻoku ne fakamahuʻingaʻi ʻe ia ʻa e meʻa ʻoku ʻofa ai.

ʻOku tau sio mo fanongo ʻi he kiʻi tamapua ʻuli mo motuʻa ʻa Losimelí ʻa e fakatātā totonu ʻo kitautolu kotoa pē. ʻOku tau hangē tofu pē ko e kiʻi tamapua ʻuli mo motuʻa ʻa Losimelí:

"… kuo mau hoko ʻo hangē ha taha taʻemaʻa homau kotoa; pea ko ʻemau ngaahi ngāue totonú ʻoku hangē ia ko e kofu pani totó."

ʻAisea 64:6

"He ʻoku ʻikai ha faikehekehe: he kuo fai angahala kotoa pē, pea ʻoku ʻikai te tau aʻusia ʻa e hoifua ʻa e ʻOtuá; ka nau maʻu foaki pē ʻa e ʻa e fakatonuhiá ʻi heʻene ʻofa pē ʻaʻana, ko e meʻa ʻi he totongi huhuʻi ʻa ia kuo ʻia Kalaisi Sīsū…"

Loma 3:23-24

ʻOku tau hangē kotoa pē ha ngaahi tamapua ʻuli mo taʻeʻaonga ʻa e ʻOtuá. Ka neongo ia, kuo fakamahuʻingaʻi ʻe he ʻOtuá kitautolu ʻaki ʻa e mahuʻinga ʻoku ʻikai lava ke fakatataua ʻaki ha meʻa ʻi he ʻuniveesí. Ko e pekia ʻa Sīsū Kalaisí (pe ko e fakaʻilonga ʻo e Kolosí), ko e fakahāʻanga taupotu ia ʻo e mahuʻinga kuo ʻai ʻe he ʻOtuá ki he ʻene fanga kiʻi tamapua ʻuli mo taʻeʻaonga ko kitautolu (ʻa ia ko e kakai kotoa pē ia).

"Kapau ʻoku pehē ʻe ha taha, ʻOku ou ʻofa ki he ʻOtuá, ʻosi ʻoku ne fehiʻa ki hono tokouá, ko e loi ia, …"

1 Sione 4:20

(Mātiu 22:36-39, Maʻake 12:29-31, Luke 10:25-28) " … Te ke ʻofa ki he ʻEiki ko ho ʻOtuá; … pea te ke ʻofa ki ho kaungāʻapí ʻo hangē ko hoʻo ʻofa kiate koē."

Ko e ʻOtuá mo hoto kaungāʻapí, pea mo kita, ʻoku ʻikai ala fakamāvahevaheʻi. Ko ia ʻa e ʻuhinga kuo pau ai ke ʻilonga ha taha ʻoku ne pehē ʻoku ne ʻofa ki he ʻOtuá, kuo pau ke ne ʻofaʻi foki hono kaungāʻapí