KO E NGAAHI MEʻA MAHUʻINGA ʻI HA FALE MĀLOHI

MAKATUʻUNGA

Ko e mālohinga ʻo ha fale ko hono makatuʻungá. ʻOku ʻikai te tau lava ʻo sio ki he makatuʻungá he ʻoku tanu loloto ia ʻi he lalo falé. Ko e taha ʻo e ngaahi siviʻanga mahuʻinga ʻo ha makatuʻunga lelei ko e loloto hono tanú ʻo puli ʻi he lalo falé.

Ko e makatuʻunga ʻo ha Siasi ko hono kau memipa moʻuí. Ko e siviʻanga ʻo e lelei mo e ʻaonga ʻo e ngāue ʻoku nau faí ko e ʻikai te nau fai fakahāhā ʻenau ngāué, ka ko kinautolu ʻoku fakatoka ʻi lalo ʻo tuʻu pe langa ai ʻa e Siasí.

NAILS

ʻOku pukepuke fakataha ha fale mālohi ʻaki ʻa e faʻo. Ko e meʻa ʻoku ne pukepuke fakataha ha Siasi ko hono kakai.

Ko ʻeni ha ngaahi meʻa mahuʻinga ʻo fekauʻaki mo ha foʻi faʻo ʻaonga:

(i) ʻOku mahuʻinga ke māsila ʻa e mataʻi faʻó. Fakaʻuta ange ki haʻo feinga ke tuki ha foʻi faʻo ʻoku peku pe ʻikai māsila! ʻOku mahuʻinga ke māsila ʻa e foʻi faʻó ʻo hangatonu ʻene ʻalu ki he feituʻu ʻoku totonu ke ʻalu ki aí.

(ii) ʻOku mahuʻinga foki ke totonu ʻa e foʻi faʻó. Kuo ke feinga ke tukiʻi ha foʻi faʻo ʻoku piko? Ko e toki ngāue faingataʻa ia mo fakaʻosi kātaki.

(iii) ʻOku mahuʻinga ʻaupito ke ʻi ai ha tatā pe ʻulu ʻo e foʻi faʻó. Kuo ke feinga ke tuki ha foʻi faʻo ʻoku ʻikai hano tatā pe ʻulu? Ko e faʻo pē ʻoku ʻi ai hono tatā pe ʻulú ʻoku ʻaonga ke puke ʻa e ʻato ʻo e falé pea mo e holisí. Ko e tataā pe ʻuluʻi faʻó ʻoku ne fai ʻa e ngāue mahuʻinga ni.

(iv) ʻOku pau pē ke tuki ʻa e faʻó ʻaki ha ivi mālohi ange ʻiate ia (hāmala).

Ko e kakai ʻo e Siasí ʻoku pau pē ke fakaivia kinautolu ʻaki ha ivi pe mafai ʻoku mālohi ange ʻiate kinautolu. ʻOku ʻikai lava ʻe ha foʻi faʻo ʻo tuki pē ʻe ia ia! ʻOku pau pē ke ʻi ai ha meʻa mālohi pe mamafa ange ke fai ʻaki hono tukí.

ʻOku ʻi ai foki ʻa e faʻo papa. Ko e ngaahi teuteu fale mahuʻinga tahá mo lelei tahá ʻoku puke fakataha kinautolu ʻaki ʻa e faʻo papa. Neongo ʻoku faingataʻa ʻaupito ke tau sio ki ai, ka ʻoku nau mahuʻinga lahi.