KO E TĀLAʻA PE KO E TAʻETUI!

ʻOku mahino mei he Tohitapú ʻa hono fakafaikehekeheʻi maʻu ai pē ʻe Sīsū ʻa e "tālaʻá" (pe veiveiuá) mei he "taʻetuí" Ko e tālaʻá ʻoku ʻuhinga ia ki he fuʻu faingataʻa ke te tui. Ka ʻoku ʻuhinga ʻa e taʻetuí ia ki he ʻete pehē he ʻikai te u tui au. Ko e tālaʻá ʻoku faiʻaki ia ʻa e loto ʻoku tauʻatāina mo moʻoni (honest). Ka ko e taʻetuí ia ʻoku faiʻaki ʻa e loto taʻefieauna. Ko e tālaʻá, ko e fekumi ia ki ha maamá. Ka ko e taʻetuí ia ko e fiemālie pē he fakapoʻuí. Ko e meʻa naʻe fakafepakiʻi mo fehiʻa ai ʻa Sīsū ko e ʻofa ʻi he fakapoʻulí ʻo ʻikai ʻi he maamá.

Vakai ki he ngaahi talanoa ki he kakai ʻo hangē ko Tōmasi, Filipe, mo Nikotimasi. Naʻa nau omi kia Sīsū mo e ngaahi loto tālaʻa naʻe tauʻatāina mo moʻoni (honest). Naʻa nau maʻu ʻa e tātālaʻa pe veiveiua fakaʻatamai naʻe moʻoni. Naʻa nau ʻomi kia Sīsū ʻenau veiveiuá pea naʻe tali fiefia ʻe Sīsū kinautolu ʻo ne fakahaaʻi ʻene ʻofa, fakaʻapaʻapa mo fie tokoni. Ko e meʻa naʻe fai ʻe Sīsū ki he ʻenau tālaʻá ko ʻene akoʻi kinautolu.

ʻOku mahuʻinga ke ako ʻe he Siasí mei ai ha lēsoni ʻo fakaʻehiʻehi mei hono fakamavaheʻi ʻa e kakai tālaʻa hangē ko Tōmasi mo Nikotimasi, ka ke tokoniʻi mo akoʻi kinautolu ki he moʻoní. ʻI he fehangahangai ʻa Tōmasi mo Sīsū hili ʻa e tālaʻa ʻa Tōmasi ki he moʻoni ʻo e toetuʻu ʻa e ʻEikí, naʻe ʻikai momoʻi fai kiate ia ha valoki pe lea taʻeʻofa. Ko e meʻa pē naʻe fai ʻe Sīsū ko ʻene fakahā kia Tōmasi ʻa e moʻoní.