KO E TAMA TAUHALA ʻO E FAʻAHINGA ʻO E TANGATÁ

Naʻe fanauʻi ia ʻi ha kiʻi kolo tukuʻuta taʻeʻiloa, ko e tama ʻa ha kiʻi fefine maʻulalo mo masiva. Naʻane tupu hake ʻi ha kiʻi kolo kehe, ʻo ne ngāue fakatufunga ai ʻo aʻu ki he ʻene taʻu tolungofulu. Hili ia naʻane fononga holo ko ha toko taha malanga. Naʻe ʻikai haʻane tohi ʻe faʻu. Naʻe ʻikai hano tuʻunga fakasōsiale, fakalotu, pe fakapolitikale. Naʻe ʻikai te ne maʻu fāmili pe ʻi ai hano ʻapi ʻoʻona. Naʻe ʻikai ke ne hū ʻo ako ʻi ha kolisi pe ʻunivēsiti. Ne teʻeki ai ke ne fononga ʻo mamaʻoange ʻi ha kilomita ʻe tolungeau mei he feituʻu naʻe faʻeleʻi ai iá. Naʻe ʻikai haʻane momoʻi fai ha taha ʻo e ngaahi ngāue ko ia naʻe takua ko e ngāue lahi mo mahuʻingá. Naʻe ʻikai hano fatongia ʻe taha ka ko ʻene moʻui taʻesiokitá pē mo ʻapasia kakato ki he ʻOtuá.

Naʻane kei taʻu tolungofulu-mā-tolu pē kuo liʻekina ia ʻe he kakaí. Ne liʻaki ia ʻe hono ngaahi kaumeʻá ʻo nau feholaki, … pea ko e toko taha ʻo kinautolu, naʻane fakafisingaʻi ia. Naʻe lavakiʻi ia ʻe ha toko taha ʻo hono ngaahi kaumeʻá ki hono ngaahi filí ʻo nau pāʻusiʻi ia. Naʻe kalusefai ia ʻi he vahaʻa ʻo ha ongo kaihaʻa ʻakau.

ʻI he ʻene meimei maté, naʻe talotalo ʻa e kau sōtia naʻa nau fai hono kalusefaí pe kohai te ne maʻu hono ngaahi kofú, ʻa ia ko e koloa pē ia ʻe taha naʻe ʻaʻana lolotonga ʻene kei moʻuí. ʻI he mahino leva kuo ne maté, naʻe ʻave ia ʻo telio ʻi ha fonualoto naʻe foaki ʻe ha toko taha ʻo hono ngaahi kaumeʻá. Hili ha ngaahi ʻaho mei hono telió, naʻe pavake mai ʻa e talanoa tokua kuo ne toetuʻu mei he maté pea kuo toutou mamata ki ai ha tokolahi.

Kuo lava ʻeni ha ngaahi senituli ʻe uofulu-ma-taha mei ai, pea ʻi he ʻaho ni, ko ʻeni ʻa e ʻamanakiʻanga ʻo e faʻahinga ʻo e tangata.

Ka tānaki fakataha kotoa ʻa e ngaahi kautau ʻo māmani kuo nau faʻa fakatē mo fepaki ʻi he ngaahi malaʻe taú, ʻa e ngaahi folau tau tahi kotoa kuo faʻa fefolauʻakí, ʻa e kotoa ʻo e ngaahi falealea kuo faʻa fakatahá, ʻa e ngaahi tuʻi kotoa pē kuo nau pulé; ʻe ʻikai momoʻi kākākunga pe fakaofiofi ʻa e ngaahi liliu kuo nau fai ki māmaní, ki he fuʻu liukava kuo hoko ki he faʻahinga ʻo e tangatá ʻi māmaní koeʻuhí naʻe ʻi ai ha Moʻui Tukuhausia ʻe taha naʻe hingoa ko Sīsū ʻo Nasaleti.

(Episcopal Bishop Phillips Brooks of Massachusetts)