KO HA ʻATA ʻO E FAKAMOLEMOLE FAKAʻOTUÁ
"Ka ko e ʻOtuá ʻoku ne fakahā ʻa e moʻoni ʻo ʻene ʻofa ʻaʻana kiate kitautolú ʻi he pekia ʻa Kalaisi maʻatautolu, lolotonga ʻoku tau kei angahalá — Pea kapau ko ia, pea ka kuo tau maʻu ʻeni ʻa e fakatonuhia ʻi hono taʻataʻá, pea huanoa hotau fakamoʻui ka fai ʻiate ia mei he houhaú."
Loma 5:8-9
Naʻe talanoa ʻe ha faifekau manako ʻi he sipoti tā-pulú, ki he taimi ʻo ʻene kei siʻi ʻo kamata ke manako ʻi he vaʻinga ni. ʻI he meimei efiafi kotoa, naʻane vaʻinga ʻi he tafaʻaki kimui ʻo honau falé ke ako ai mo faʻifaʻitaki hono ngāueʻaki ʻo e ngaahi ʻakau tā-pulú. Naʻe tapui ia ʻe he ʻene mātuʻá ke ʻoua te ne ngāueʻaki ha pulu tā-pulu moʻoni ʻi honau tuʻafalé he ʻe fuʻu fakatuʻutāmaki ʻaupito. Ko ia naʻane ngāueʻaki pē ʻa e ngaahi faʻahinga pulu vaʻinga; oku maʻamaʻa ʻaupito pea ʻoku ngaohiʻaki ʻa e palasitiki pea ʻoku ava ʻa loto. Ko e faʻahinga pulu ia ʻe ʻikai ʻalu mamaʻo haʻate taaʻi pea ʻe ʻikai ke fakatuʻutāmaki.
Faifai, ko e ʻaho ʻe taha, naʻane ʻamanaki ʻoku fakatou mamaʻo mei honau ʻapí ʻa ʻene ongo mātuʻá, pea ʻoku ʻikai ha taha ʻi honau falé, pea ake hake foki ʻiate ia ʻa e fakaʻamu ke ne ʻahiʻahiʻi ha foʻi pulu tā-pulu moʻoni ʻo vakai pe ʻoku fēfē ʻene pakihí mo ʻene ongo ʻi he ʻakau tā-pulú.
Naʻane hiki ʻa e ʻakau tā-pulú ʻo ʻai ʻa e fuʻu hapo. Uoke, ne afe atu ʻa e foʻi pulú ʻo hangatonu ki he matapā sioʻata ʻo e loki mohe ʻo ʻene ongo mātuʻá. Fakatatau ki he ʻene fakamatalá, naʻane pehē:
"Naʻaku fanongo atu ki he movete ʻa e sioʻatá, peau fanongo atu ki he leʻo ʻo ʻeku faʻeē ʻa ʻene fākafoá. Naʻaku lele atu ki fale, ʻou kaka hake ki hona lokí. Naʻe tuʻu mai ai ʻeku faʻeē ʻi he veʻe matapā sioʻatá kuo mafōfoa pea kuo ne fetotoʻi. Naʻe kamata leva ke u tangi loʻimata, pea ko ʻeku lea pē naʻe lavá ko ʻeku pehē ki ai: "Mum, ko e hā ʻa e meʻa kuo u faí?. Ne u mei tāmateʻi koe." Ko ia pē ʻa e lea naʻaku toutou leʻaki kiate iá. Ko ʻene tali pē naʻane fai ko ʻene faʻufua au mo ne pehē: "ʻOua te ke hohaʻa. ʻOku ou sai pē au. ʻE lelei pē ʻa e meʻa kotoa ia." Hili ia, naʻe ʻikai pē te u toe fie ʻave ha foʻi pulu tā-pulu moʻoni ʻo vaʻinga ʻaki ʻi homau tuʻafale." (Loma 5:8-9)