KO PĪSOPE KALISOSITOMI (ʻELELO KOULA)

Naʻe pīsope ʻa Sione Kalisositomi (ʻoku ʻiloa ʻe he tokolahi ʻaki hono hingoa fakatenetene ko ʻElelo Koula koeʻuhí ko ʻene leʻoafeá) ʻi he fuʻu kolomuʻa ʻo e Puleʻanga Loma ʻi he hahaké naʻe ʻiloa ko Konisitanipoli (Constantinople). ʻOku ʻiloa ia he ʻaho ni ko ʻIsitanipulu (Istanbul) ʻi Toake. Naʻe ʻikai ko ha fakaʻatuʻatu ʻa e koloaʻia mo e fakaemāmani ʻa e moʻui ʻi he lotoʻā ʻo e ʻEmipola Theodosius I kaeʻumaʻā hono kuini naʻe hingoa ko Eudoxia. Naʻe ʻikai ke tali ʻe Kalisositomi ke ne hoko ko e faifekau ia ʻa e ʻEmipolá mo hono Kuiní. Naʻe ʻikai ke fai fakapulipuli ʻa ʻene valokiʻi mo fakaangaʻi ʻa e mānumanu ʻa e kalasi tuʻumālié. Naʻe fehiʻa ʻaupito ʻa e Kuiní ʻia Kalisositomi, pea naʻe iku ai ʻo tuʻo ua hono fakaheeʻi ʻo e Pīsope ni mei he ʻene potungāue.

Lolotonga hono fakaheeʻi fakamuimuí, naʻa ne fai ai ha tohi ki ha taha ʻo hono ngaahi kaumeʻá ʻo ne pehē: Naʻe ʻikai haʻaku momoʻi hohaʻa ʻi hono tuli au mei heʻeku ngāué ka naʻaku pehē loto pē, "Kapau ʻoku loto ʻa e Kuiní ke fakaheeʻi au, ʻoku ne faʻiteliha pē, he ʻoku ʻa e ʻEikí ia ʻa māmani. Kapau ʻoku ne loto ke fakamelemoʻi au ʻi moana, te u feʻao au mo Siona. Kapau te ne lī au ki ha loto afi, te mau kaungā ʻi ai mo Setaleki, Mēsake, mo ʻApitenikō. Kapau ʻe lī au ki he fanga manu fekaí, te u ʻi ai mo Tāniela ʻi he ʻana ʻo e fanga laioné. Kapau ʻoku ne loto ke tolomakaʻi au, te u ʻi ai mo e ʻuluaki maʻata, ko Setivení. Kapau te ne fiemaʻu hoku foʻiʻulú, ʻe lelei pē mo ia, he te u ʻi ai mo Sione Papitaiso. Naʻaku haʻu telefua pē mei he manava ʻo ʻeku faʻeē, pea te u toe foki telefua pē ki ai." Naʻane pekia ʻi he ʻaho 14 ʻo Sepitema ʻo e taʻu 407 TS lolotonga hono fakaheeʻi fakaʻosí.

ʻOku lolotonga fakatolonga ʻe he Siasi Faka-Kalisitiané ha taha ʻo e ngaahi lotu ʻiloa mo tukufakaholo naʻe fai ʻe he Pīsope māʻoniʻoni mo leʻoafea ni ʻa ia ʻoku pehē:

Ko e lotu ʻa ʻElelo Koula.

ʻE ʻOtua Māfimafi kuo ke tuku kiate kimautolu hoʻo kelesí ʻi he taimi ni, ke mau fai loto taha ha ngaahi kole kiate Koe; pea kuo Ke fakahā, kapau ʻe fakataha ha toko ua, pe toko tolu,ʻi ho huafá, te ke fai ki he ʻenau kolé: ʻE Sihova, ke Ke fakaai ʻa e ngaahi holi ni mo kole ʻa ho kakaí, ʻo ka kuo taau ke mau maʻu; kaekehe ke tuku kiate kimautolu ʻi he maama ko ʻení ʻa e ʻiloʻi ʻa Hoʻo moʻoní, pea ʻi he maama kahaʻú ʻa e moʻui taʻengatá. ʻĒmeni