KOEʻUHÍ PE KO AU!

Naʻe ʻi ai ha tangata ʻInitia poto lahi ʻaupito naʻe lotu Hinitū. Naʻa ne fononga atu ʻi ha ʻaho ʻe taha ʻo ne sio ki ha tuʻunga-lō pea ne tuʻu hifo ke mamata ki he meʻa ʻa e fanga loō ʻoku faí. Ka naʻa ne fakatokangaʻi ʻi he ʻene punou ke sio ofi ki he tuʻunga-loō, naʻe manavahē ʻa e fanga kiʻi loō ʻi hono ʻatá pe malumalú ʻo nau lele noaʻia ki he ngaahi feituʻu kehekehe. Naʻa ne fakakaukau ke tuʻu hangatonu pea ke ʻoua ʻe malumalu ʻa e tuʻunga-loō ʻi hono ʻatá. Naʻa ne fakatokangaʻi hili ha kiʻi taimi siʻi ʻi he puli hono ʻatá mei he tuʻunga-loō, naʻe toe foki mai ʻa e fanga kiʻi loō ʻo hoko atu ʻenau ngāue naʻe faí. Naʻe fakakaukau ʻa e tangatá ke toe punou tuʻo ua ʻo vakai pe ko e hā ha meʻa ʻe hokó. Ko e meʻa tatau ai pē naʻe hokó ʻa e manavahē ʻa e fanga kiʻi loō ʻo nau movete ki he ngaahi potu kehekehe.

Naʻe fakakaukau loto ʻa e tangata Hinitū ni ʻo ne pehē: "Taumaiā naʻaku lava ʻo talanoa mo e fanga kiʻi lō ni ke u fakamahino kiate kinautolu he ʻikai te u fai ha meʻa kovi kiate kinautolu." Naʻe hokohoko atu pē ʻene fifili ʻi he meʻa naʻane mamata ai. Faifai naʻa ne pehē loto pē: "Neongo pē te u lava ʻo talanoa ki he fanga kiʻi loō, pea kapau te u lava ʻo leaʻaki ʻenau leá, pea kapau ʻoku nau maʻu ha ʻatamai, mahalo ʻe kei taʻemalava ai pē haʻa mau fetuʻutaki mo femahino ʻaki, koeʻuhí ko e fuʻu faikehekehe ʻo ʻeku fakakaukaú mei he ʻenau fakakaukaú. He ʻikai pe ke lava ia ʻo mahino kiate kinautolu haʻaku feinga ʻe fai koeʻuhí ko ʻemau faikehekehé.

Naʻe hokohoko atu pe ʻene fifilí ʻo ne pehē: Ka ʻo kapau te u hoko ko ha nau toko taha, ka u kei maʻu pē ʻeku ngaahi fakakaukaú mo hoku ʻulungaangá, mahalo te u lava ai ʻo fakaʻinasi kinautolu ʻaki ʻeku ngaahi fakakaukaú.

Naʻe toki ake fakafokifā mai kiate ia ha fakakaukau ʻo ne pehē: "ʻOiauē fakapō! Ta ko ʻeni ʻa e meʻa ʻoku tuʻuaki mai kiate kitautolu ʻe he kau faiako Kalisitiané ʻi he taimi kotoa pē. Naʻe hoko mai ʻa e ʻOtuá ʻo tupu ko e tangatá koeʻuhí ke mahino kiate kitautolu ʻa e ʻOtuá, pea ke ne lava ai ʻo fakahaofi kitautolu. ʻOku pehē naʻe talu ai ʻa e liliu ʻa e toko taha ni ʻo hoko ko e Kalisitiane.