ʻO MAʻU HA KONGA SIʻI ʻO HONO ʻIMISÍ

Ko e taha ʻo e kau ngāue fakamisinale ʻiloa ki ʻInitiá ko e fefine naʻe hingoa ko Amy Carmichael. Naʻa ne fakatāpui ʻene moʻuí ke tokoniʻi mo fakahaofi ʻa e fanga kiʻi tamaiki fefine iiki ne nau ngāue mo moʻui pōpula mo fai ʻa e ngaahi ngāue taʻemaʻa mo fakahīteni ʻi he ngaahi Temipale faka-Hinitū ʻo ʻInitiá. Ko e ʻaho ʻe taha naʻane ʻave ha niʻihi ʻo e fanga kiʻi tamaiki naʻane tauhí ki ha falengāue ʻo ha tangata tufunga-koula ke nau mamata ʻi he founga ʻo hono fakamaʻa ʻo e koulá.

ʻI he ʻenau hū atú, naʻa nau sio ʻoku tangutu mai ʻa e tangata tufunga-koulá ʻi he tafaʻaki ʻo ha tālafu ʻoku tutu ai ha afi ʻoku tafuʻaki ha malala (coal). Naʻe hilifaki ʻi he funga malalá ha laʻi taila ʻato fale ʻoku fakafoʻohake, pea ʻoku toe tāpuniʻi mei ʻolunga ʻaki ha laʻi taila ʻato fale ʻe taha. Ko ia ʻa e meʻa naʻa ne ngāueʻaki ko e kulo ke haka ai ʻa e koulá. ʻI he loto kulo ni ne ʻosi fetuiaki ai ʻe he tangata tufunga-koulá ha māsima, fuaʻi-ʻakau ko e tamaline, pea mo ha efuefuʻi piliki ʻa ia naʻa ne pehē ko e ʻai ia ke fakamohemohe ʻaki ʻa e koulá.

Na ʻa ne toki lī leva ki ai ha fuʻu konga maka ʻoku pipiki ai ʻa e koula. Naʻa ne toki ʻai leva ʻa e afí ke matuʻaki kakaha mo vela ʻaupito ke kai tokua ʻe he afí ʻa e koulá. Fuoloa siʻi, naʻe toʻo ki tuʻa ʻe he tangatá ʻa e koulá ʻaki ha meʻahiki ʻo ne tuku taimi siʻi ke kiʻi mokomoko, mo ne sivisivi pe kuo fēfē. Naʻa ne toe toʻo ʻa e konga koulá ʻaki ʻa e hikongá ʻo tuku ki he kuló ʻo ne toe tapili ʻa e afí ke kakaha ange mo vela ange. Naʻe toutou fai pehē ʻa e tangata tufunga-koulá ʻi he ʻene toutou sivi ʻa e konga koulá mo tafunaki ʻa e afí ke kakaha ange mo fakautuutu ʻene velá.

Naʻe fakamatala ʻa e tufungá ki he kau ʻaʻahí ʻo pehē: ʻI he kamakamata ke haka ha konga maka ʻoku ʻi ai ha koula, ʻoku faingataʻaʻia ʻaupito ʻa e konga maká ʻi he vela ʻa e afí ka ʻi he hili ha taimi hono toutou fakalahi ʻa e kakaha mo e vela ʻa e afí, ko ʻene fakautuutu ange ia ʻo ʻene maʻa ʻa e koulá pea kuo hoko ʻo faingofua pē ki ai ʻa e vela ʻa e afi. Kuo hoko ʻa e faingataʻa naʻa ne ʻamanaki ke hoko ko hono maumauʻí, ko ha toki tokoni moʻoni ia ki hono fakamaʻá.

Lolotonga ʻa e mamata ʻa e fanga kiʻi tamaikí, naʻe fehuʻi ange ʻe ha toko taha ki he tangatá: Te ke ʻilo fēfē kuo maʻa moʻoni ʻa e koulá? Ko e tali ʻa e tangata naʻa ne pehē: Ko e taimi ko ia te u sio lelei ai ki hoku ʻatá ʻi he koula (koula kuo vaia ʻi he kulo), ko e fakaʻilonga ia kuo maʻa moʻoni