ʻOUA ʻE MAUMAUʻI NOAʻIA ʻA E MAHAFU FAKALAUMĀLIÉ

Naʻe ʻi ai ʻa e taimi lolotonga ʻa e senituli 18 naʻe fekeʻikeʻi ai ʻa Pilitānia mo Falanisē pe ko hai te ne puleʻi ʻa e fuʻu konga ko ia ʻo ʻAmelika Tokelau ʻoku ui he ʻaho ni ko Kānatá. Naʻe tuʻutuʻuni ai ki he ngaahi vaka ʻo e tau-tahi Pilitāniá ke nau lī-taula pē ʻi he vaitafe ko Saint Lawrence ofi ki he kolo ʻo e kau Falanisē ko Quebec ʻo tatali ai kaeʻoua kuo aʻu hake ʻa e kau tauʻutá, pea ke nau toki kau fakataha ʻi hono ʻohofi ʻo e kau Falanisē. Ko e pule ʻo e folau tau tahi Pilitāniá naʻe hingoa ko ʻAmilali Phipps. Ko e taimi foki ʻeni naʻe fuʻu mālohi ai ʻi Pilitānia ʻa e fehiʻa ʻa e tokolahi ʻo e ngaahi Siasi Palotisaní ki he Siasi Katolika Lomá, pea ko e toko taha ʻa ʻAmelali Phipps ʻi he kakai mamahiʻi Palotisani ko iá.

ʻI he ʻaho ko ia naʻe tuʻutuʻuni ai kiate ia mo ʻene tau tahí ke nau tatali ofi ki Quebec, naʻe vave ʻaupito ʻa e aʻu ki Quebec ʻa ʻAmelali Phipps teʻeki ke aʻu mai ʻa e kau tauʻutá. Lolotonga ʻenau tatali mei honau vaká, naʻane sio ki he fuʻu falelotu (cathedral) Katolika ʻo Quebec kaeʻumaʻā hono ngaahi ʻīmisi ʻo e kau sangato ʻo e siasí ʻoku teuteuʻiʻaki ʻa e tuʻafalé mo e ʻató, naʻe ake ai ʻene ʻita mo loto taaufehiʻa. Ko ia naʻa ne tuʻutuʻuni ke ngāueʻaki ʻa e ngaahi meʻafana lalahi ʻa hono vakataú ke fana ʻa e ngaahi ʻīmisi naʻa nau sio ki aí. ʻOku ʻikai ʻilo ʻe taha pe ne tau ha fana ʻi ha ʻīmisi pe ʻikai.

Ko e meʻa pē ʻoku ʻilo pau mei he hisitōliá, ʻi he hoko ʻa e taimi naʻe aʻu hake ai ʻa e tau-ʻuta Pilitāniá ki he feituʻu naʻe muʻaki poloʻi ke nau ʻohofi fakataha ai mo e tau tahí ʻa e kau Falaniseē, pea ʻi he taimi naʻe fekau mai ai kia ʻAmelali Phipps ke nau tokoniange ki he kau tauʻutá; naʻe toki ʻilo ai ʻe he ʻAmelalí tā kuo ʻosiʻosingamālie ʻene mahafú ʻi hono fanaʻaki ʻa e ngaahi ʻīmisi ʻo e kau sangató. Maumauʻi ʻa e mahafú ʻi he taauifehiʻa fakasiasí, kae tuku ʻa e kau Falanisē ko e fili ʻo e kau Pilitāniá. ʻOku pehe ni ʻa e lau ʻa ha himi ki he matatau ʻa e Filí ʻoku totonu ke fehangahangai mo e kalisitiane kotoa pē, ʻo ʻikai ko e fetaaufehiʻa ʻaki fakasiasi:

Ko e tau mālohi ʻoku tatali mai, Katoa ai ʻa e koví, Heli, mo Māmani.

From “Ko e Hofangahau” by Siupeli Taliai.